ALIHO NYASAYE WABWENE MULALA YENYENE
OMWAMI Nyasaye weefwe nOMWAMI mulala; omuheelenje OMWAMI Nyasayewo nende omwoyokwo kwosi, neshiimoshio shiosi, namaaniko kosi. Okhuka. 6:4b, 5
Okhuba kano niko aka OMWAMI yaboola, owalonga likulu, ne niye Nyasaye, owakhola eshialo nashilomba; yashiralisia, shiyashilonga shibe eshikhaya butswa ta; yashikhola mbu shimenywemwo; yaboola mbu Nisie OMWAMI; ne abulaho oundi. Isaya 45:18
Mbu abetsimbia tsiosi tsiomushialo bamanye mbu OMWAMI niye Nyasaye; abulaho oundi. 1 Abaruchi 8:60
OMWAMI aboola mbu Inywe muli abaloli banje, khandi omusumba wanje owa ndalobola; mbu mumanye nimusuubila, nimutiila khushisina mbu nisie ye; shiyaliho Nyasaye yesi owakholwa, isie nishili okhubaho, kata shialibaho inyuma wanje ta. Isie omwene, nisie OMWAMI; ne abulaho omuhonia undi yesi ta. Isaya 43:10, 11
Muhenje khwisie, ne mulahonibwa, inywe tsindulo tsiosi tsieshialo; shichila isie endi Nyasaye, nabulaho oundi. Isaya 45:22
NYASAYE YAKHUHEELA
OMWAMI yamuloleshela okhurula ehale, ari Ndakhuheela obuheeli oburahwaho ta; niko akachila ndatsitsachisia obuheeli bwanje oburalilu khwiwe. Yeremia 31:3
Okhuba emanyile tsiyemi etsia emukasiliye, nilwo olwa OMWAMI aboola; mbu tsiyemi tsiomulembe, netsiobubii ta; okhumuheelesia eshiokhunaayila inziayo. Yeremia 29:11
OMWAMI aboola mbu Ndamuheelile. Malaki 1:2a
Shinga samwana abaana olwa atiililwa abaanabe eshisa, nolwa OMWANI atiililwa abamuriitsanga eshisa ario. Tsitsabuli 103:13
Lola, kali akomulembe kwanje akachila ndanyoola obululu muno. Ne khulwa obuheeli khuroho yanje wachihonia mubuko bwobutibi; shichila wasukuune ebionoono bianje emukongowo. Isaya 38:17
Neefu khumanyile khandi khusuubiliile obuheeli obwa Nyasaye ali ninabwo khwifwe. Ifwe khuheelanga, shichila ye yaranjilila okhukhuheela ifwe. 1 Yohana 4:16a, 19
OMWAMI Nyasayewo ali hakariwo, omululu, oulahula; alakhusangaalila nokhwikhoya; alakhukhola omuyia mubuheelibwe; alakhwikhoyela niyeemba tsinyimbo. Zefania 3:17
EBIONONO BIKHWAUKHASINJIA OKHURULA KHU NYASAYE
Niko akachila, shinga obwonooni olwa bweenjila mushialo khulwa omundu mulala, nende okhufwa khulwa obwonooni; nindio okhufwa khwatswanila abandu bosi, okhuba bosi boonoona. Abaroma 5:12
Ne obumayaanu bweenywe bwamukabukhasiye nende Nyasaye weenywe, khandi ebionoono bieenywe bibisile obwenibwe, muleshe okhubulola, kata shiyeenya okhuhulila ta. Isaya 59:2
Nasinjila hekulu wabandu, nabasunjila mbu Kano niko aka Nyasaye aboola; mbu Mbushiina nimukhayanga amalako kOMWAMI, oburanyala okhukaasa ta? Okhuba mumuleshile OMWAMI, naye yesi amuleshile inywe. 2 Aketsindaalo 24:20b
Okhuba inumba yiingana obwonooni bwobufumu, khandi obwichinjimisi bwingana obumayaanu nende emiterafi. Okhuba waloba likhuwa liOMWAMI, naye yesi yakhuloba iwe, oleshe okhuba omuruchi. 1 Samweli 15:23a
Nasi okhubisa ndalabisa tsimoni tsianje khunyanga eyo khulwa obubii bwosi obwa bababa nibakholile. Okhuka. 31:18a
Omwoyo okwonoonanga, okwene kulafwa. Ezekieli 18:20a
OKHWIBULWA KHWA YESU KHWABOOLWA
Nyasaye yaruma malaika Gaburieli khwitaala lindi lieGalilaya elilangwa mbu Nazareti, ewomukhaana omushisila owali nakhweebungwa nende omusaatsa oweliiralie Yusufu, owomushilibwa shiaDaudi; neliira liomukhaana oyo niMariamu....Malaika oyo namusunjila ari Oraria tawe, Mariamu; okhuba Nyasaye akhukoosiye muno. Ne lola olabelekha inda, niwibula omwana omusiani, nomukulikha eliira mbu YESU. Aliba omukhongo khandi alilangwa mbu Omwana waOyo Ouli Ikulu Muno; ...akata oburuchibwe shibuliba neshihesi ta. Mariamu namureeba malaika ari Kano kaleekhola karie, olwa endashiamanya omusaatsa ta? ............
Naye malaika nakalusia, namusunjila mbu Roho Omutakatifu alakhwitsila, obunyali bwa Oyo Ouli Ikulu Muno nabwo bulakhufwimba; niko akachila eshieneshio eshiitsa okhwibulwa shilalangwa mbu eshitakatifu mbu Omwana waNyasaye....Shichila khuNyasaye libulaho likhuwa liosi eliranyalikha ta. Mariamu naboola mbu Lola, endi omutitiikhani wOmwami; kalambeela shinga olwa osunjile. Luka 1:26b-38a
Abandu balia bonyene abetsa mushialo ne balaburire munjila yobwambani bwo musatsa nende omukhasi ne Adamu nende Kristo. Adamu yarera ebidnono mushialo halali Yesu naye narera obuhuli khubionono.
KHWAKHAKHOLE KHURIE NENDE YESU?
Lola, esinjiile khumuliango nikhong'onda; omundu yesi naba nahulila omwoyo kwanje, niyeekula omuliango, ndaleenjilamwo, nindia ninaye ebiliibwa, naye ninasi. Obufwimbuli 3:20
Nabasunjila mbu Bukule Roho Omutakatifu. Sabe, ne mulanyoola, mbu okhwikhoya khweenywe khwitsule. Yohana 20:22b; 16:24b
Ouheelanga samwana kata nyina okhuyomba shinga olwa yaheela isie, shiyangwanila tawe. Mana Yesu naboolela abeechibe ari Omundu yesi naba niyeenya okhuba omulondi wanje, yeekaanie omwene, yeetuushe omusalabakwe, yanondenjekhwo. Okhuba owenya okhuhonia obulamubwe, alabukosia; ne oubukosia obulamubwe khulwanje alabunyoola. Matsayo 10:37a; 16:24, 25
Okhuba noba norumbula ebulafu nende omunwakwo shinga Yesu olwa ali ye Omwami, nende okhusuubila mumwoyokwo shinga Nyasaye olwa yamulamusia mukhufwa, olahonibwa. Abaroma 10:9
Ne nimuba nimuli baKristo, kho muli olwibulo lwaAburahamu, khandi abobulaame. Abagalatia 3:29a
Nabo nibakalusia mbu Suubilila Omwami Yesu, kho olahonibwa, iwe omwene nende abeinzuyo bosi. Ebikhole 16:31
MU YESU KHULI NENDE OBULAMU OBUYAKHA
Mbu Nyasaye yakhuheelesia obulamu bwobumeli; nabwo obulamu obwo buli muMwanawe. Ouli nende Omwana ali nende obulamu tsana; ne ourali nOmwana oyo ta, shialikhwo nende obulamu tsana tawe. 1 Yohana 5:11b, 12
Shichila lilako liaRoho wobulamu obuli muKristo Yesu liayamboholoole okhurula mwilako liobwonooni nende eliokhufwa. Abaroma 8:2
Ndabambwa khumusalaba halala nende Kristo; ne endi mwoyo; khane shishili isie ta, habula Kristo oubeetsanga mwoyo mwisie; nobulamu obwo obwa endi ninabwo mumubili, endi ninabwo mubusuubili obuli muMwana waNyasaye, owa'heela niyeehaana omwene khulwanje. Abagalatia 2:20
Okhuba omundu yesi naba nali muKristo, aba omulonje omuyia; amakhuwa kakhale kaba nikamalile okhubira; lole, kosi keekaluule amayia. 2 Abakorinzo 5:17
Mweebulwa obwibulwi obuyia; ne shikhuli khumwo eyibola, habula khuyeneyo eyirabola ta, khulwa likhuwa liaNyasaye, eliba mwoyo niliyindila. 1 Petero 1:23
Mufwane shinga abaana abakheebulwa, mwenyenje amabeele ameeleleshe akeshiroho, mbu kamukhusie okhuula khubuhonia. 1 Petero 2:2
YESU ALILAMUSIA ABALONDI BEBE ABESIKWA
Ne Roho wa oyo owalamusia Yesu mukhufwa naba namenya mwinywe, ye owamulamusia Kristo Yesu mukhufwa alaheelesia emibili chieenywe chioburulanda chiosi obulamu khulwa Rohowe oumenyanga mwinywe. Abaroma 8:11
Ne Nyasaye yamulamusia Omwami mukhufwa, khandi alikhulamusia ifwe ario khulwa obunyalibwe. 1 Abakorinzo 6:14
Okhuba kano niko aka Papa yeenya, mbu buli mundu oumulola Omwana namusuubilila, abe nobulamu bwobumeli; nasi ndilimulamusia khunyanga yobumaliilishi. Yohana 6:40
Okhuba shinga okhufwa olwa khweetsa khulwa omundu, obulamushi bwabafu nabwo bweetsa khulwa omundu burio. Okhuba shinga bosi olwa bafwila muAdamu, nolwa bosi balalamusibwa muKristo bario. Ne buli mundu mutsisinjitsie; mbu Kristo ouli omurongole; mana khukhwitsakwe, abo abali baKristo. 1 Abakorinzo 15:21-23
Ne okhuba endi mwoyo, neenyu mwesi mulaba mewoyo. Yohana 14:19b
Ne nikhuba nikhwafwa halala nende Kristo, khusuubila mbu khulabaho abalamu ninaye khurio. Abaroma 6:8
YESU YETSANGA OBE NIWIRECHESHE!
Okhuba Omwami omwene aleekha okhurula mwikulu halala nomulanjisio nomwoyo kwamalaika omukhulundu, nende olwika lwaNyasaye; nabo abafwila muKristo balaranjilila okhulamukha; mana ifwe ababa nikhushiliho mwoyo khulakaamwa ninabo halala mumaleesi, okhwakaana nOmwami mulwanga; mana khurio khulabeetsanga nOmwami tsindaalo tsiosi. 1 Abatsesalonika 4:16, 17
Mbu olwa alaba nabisuulwe khube neitswoni, nikhurafwimbwa omurwe imbeliwe khukhwitsakhwe ta. 1 Yohana 2:28b
Nilwo olwa Omwami Ounyala-biosi aboola. Kho abaheelwa banje, olwa khwasuubisibwa amakhuwa ako, khwisiiye abeene mushifwabwi shiosi shiomubili nende eshiaroho, nikhuusilia elala obutakatifu mukhuria Nyasaye. 2 Abakorinzo 7:1
Neenyu mwesi mwisimilisie murio; mwitinyie emioyo chieenywe; shichila okhwitsa khwOmwami khuli ahambi. Murabuuluulilananga abeene khubeene ta, baana beefwe, mbu muleshe okhuyaasibwa; lole, omuyaasii mwene usinjiile amuliango. Yakobo 5:8, 9
Nineenywe mwesi murio, mwirecheshe; shichila khusaa eya murapaarakhwo ta, Omwana wOmundu yeetsa okhwitsa. Luka 12:40